غزہ: جنوبی غزہ کے شہر خان یونس میں واقع ناصر میڈیکل کمپلیکس پر اسرائیلی فضائی حملے کے نتیجے میں کم از کم 6 افراد جاں بحق جبکہ 20 سے زائد زخمی ہو گئے ہیں۔
خبر رساں ادارے اے ایف پی کے مطابق غزہ کی سول ڈیفنس ایجنسی کے ترجمان محمود باسل نے بتایا کہ حملے کے بعد طبی مرکز کی ایک عمارت سے جاں بحق افراد کی لاشیں اور زخمیوں کو نکالا گیا۔ ناصر اسپتال انتظامیہ نے بھی 6 افراد کی ہلاکت کی تصدیق کی ہے۔
اسرائیلی فوج نے حملے کی تصدیق کرتے ہوئے مؤقف اختیار کیا کہ اسپتال کے احاطے میں حماس کی موجودگی تھی اور اسے کمانڈ سینٹر کے طور پر استعمال کیا جا رہا تھا۔ اسرائیلی فوج کے مطابق یہ کارروائی مبینہ خطرے کو ختم کرنے کے لیے کی گئی۔
دوسری جانب حماس کے ترجمان حازم قاسم نے اسپتال پر حملے کو جنگی جرم قرار دیتے ہوئے غزہ میں جنگ بندی کی نگرانی کے لیے قائم امریکی حمایت یافتہ بورڈ آف پیس کو بھی تنقید کا نشانہ بنایا اور اسے حملے کی روک تھام میں ناکامی کا ذمہ دار ٹھہرایا۔
ادھر غزہ کے وسطی علاقے میں واقع البریج کیمپ میں بھی اسرائیلی فائرنگ سے ایک شخص جاں بحق ہو گیا۔ مقامی اسپتال نے لاش موصول ہونے کی تصدیق کی ہے، جبکہ اسرائیلی فوج کا کہنا ہے کہ وہ واقعے کی تحقیقات کر رہی ہے۔
واضح رہے کہ اسرائیل اور حماس اکتوبر 2025 میں نافذ ہونے والی جنگ بندی کی خلاف ورزیوں کے الزامات ایک دوسرے پر عائد کرتے رہے ہیں۔ غزہ کی وزارتِ صحت کے مطابق جنگ بندی کے آغاز سے اب تک 1,590 سے زائد فلسطینی جاں بحق ہو چکے ہیں۔
غزہ میں جاری صورتحال کے باعث طبی مراکز، شہری آبادی اور جنگ بندی کے مستقبل کے حوالے سے تشویش میں اضافہ ہو رہا ہے۔






