اسلام آباد: وفاقی حکومت نے بجلی کی تقسیم کار کمپنیوں اور انجینئرنگ کے شعبے سے وابستہ سرکاری ادارے کے انتظامی معاملات میں تبدیلیوں کی منظوری دے دی ہے۔
بزنس ریکارڈر کے مطابق یہ منظوری وفاقی وزیر خزانہ سینیٹر محمد اورنگزیب کی سربراہی میں منعقدہ کابینہ کمیٹی برائے سرکاری اداروں کے اجلاس میں دی گئی، جس میں تین اہم اداروں کے بورڈز سے متعلق معاملات زیرِ غور آئے۔
اجلاس کے دوران حیدرآباد الیکٹرک سپلائی کمپنی (HESCO) کے بورڈ آف ڈائریکٹرز کی نئی تشکیل اور سکھر الیکٹرک پاور کمپنی (SEPCO) کے بورڈ میں آزاد ڈائریکٹر کی شمولیت کی تجویز منظور کی گئی۔
اسی طرح نیشنل انجینئرنگ سروسز پاکستان (NESPAK) کے لیے چیئرمین اور آزاد ڈائریکٹر کی تقرری کی بھی منظوری دے دی گئی۔
اس موقع پر وزیر خزانہ محمد اورنگزیب نے ہدایت کی کہ سرکاری اداروں کے بورڈز میں حکومتی نمائندوں کی نامزدگی کرتے وقت ان کی پیشہ ورانہ قابلیت، متعلقہ شعبے کا تجربہ اور ادارہ جاتی معاملات سے واقفیت کو ترجیح دی جائے۔
انہوں نے اس بات پر زور دیا کہ بورڈز میں شامل سرکاری نمائندے اپنے متعلقہ محکموں کی مؤثر نمائندگی کرنے کی صلاحیت رکھتے ہوں، تاکہ اداروں کے انتظامی اور فیصلہ سازی کے معاملات بہتر انداز میں انجام دیے جا سکیں۔






