ندن: ایران سے متعلق سکیورٹی خدشات کے پیشِ نظر امریکی فوج نے برطانیہ کے ایک اور فضائی اڈے سے اپنے طیارے منتقل کر دیے ہیں۔
خبر رساں ادارے رائٹرز کے مطابق وال اسٹریٹ جرنل نے اپنی رپورٹ میں بتایا کہ امریکی فوج نے پیر کے روز مشرقی انگلینڈ میں واقع RAF Mildenhall سے کئی طیارے جرمنی اور دیگر مقامات پر منتقل کیے۔ رپورٹ کے مطابق دو امریکی ری فیولنگ ٹینکرز کو پہلے جرمنی منتقل کیا گیا، جبکہ بعد ازاں مزید طیارے بھی مختلف مقامات پر منتقل کیے گئے۔
رپورٹ میں بتایا گیا ہے کہ RAF Mildenhall اور RAF Lakenheath پر امریکی سکیورٹی الرٹ بھی بڑھا کر FPCON Charlie کی سطح پر کر دیا گیا ہے، جو ممکنہ دہشت گردانہ کارروائی کے خطرے سے متعلق ایک اعلیٰ سکیورٹی درجہ ہے۔
یہ پیش رفت ستمبر میں RAF Fairford سے امریکی بمبار طیاروں کی منتقلی کے بعد سامنے آئی ہے۔ اس سے قبل اس اڈے کے قریب مشکوک سرگرمیوں کے باعث سکیورٹی خدشات پیدا ہوئے تھے۔
امریکی یورپی کمانڈ نے طیاروں کی مخصوص نقل و حرکت کی تصدیق یا تردید نہیں کی، تاہم کہا ہے کہ فوجی طیاروں کو مختلف وجوہات کی بنا پر ایک مقام سے دوسرے مقام پر منتقل کیا جاتا ہے اور سکیورٹی صورتحال کا مسلسل جائزہ لیا جاتا ہے۔
برطانوی حکام نے بھی جاری آپریشنل معاملات پر تبصرہ کرنے سے گریز کیا ہے۔






