پاکستان کو سعودی عرب کی جانب سے 3 ارب ڈالر کی مالی سہولت میں توسیع مل گئی ہے، جس سے ملک کو بیرونی ادائیگیوں کے دباؤ میں عارضی ریلیف حاصل ہونے کی توقع ہے۔ وزیرِ خزانہ محمد اورنگزیب نے تصدیق کی ہے کہ سعودی عرب نے اس رقم کی واپسی کی مدت ایک مناسب عرصے کے لیے بڑھا دی ہے، تاہم انہوں نے نئی مدت یا حتمی تاریخ کی وضاحت نہیں کی۔
وزیرِ خزانہ کے مطابق پاکستان کی بیرونی مالی صورتحال پہلے سے بہتر ہے اور زرمبادلہ کے ذخائر تین ماہ سے زیادہ کی درآمدات کے لیے کافی ہیں۔ ان کا کہنا تھا کہ پاکستان نے امریکا سے 10 ارب ڈالر کی مجوزہ مالی سہولت کی درخواست ضرور کی تھی، تاہم اگر یہ سہولت حاصل نہ بھی ہوئی تو حکومت کے پاس متبادل مالی منصوبے موجود ہیں۔
ان متبادل منصوبوں میں یورو بانڈز، پانڈا بانڈز اور روپے سے منسلک ڈالر سیٹلڈ بانڈز کا اجرا شامل ہے۔ دوسری جانب وزارتِ خزانہ کے مطابق رواں مالی سال کے دوران پاکستان کی بیرونی مالی ضروریات اور قرضوں کی ادائیگیوں کے لیے مختلف انتظامات کیے جا رہے ہیں۔
سعودی عرب کی جانب سے قرض کی مدت میں توسیع پاکستان کے لیے اہم پیش رفت ہے، تاہم اس سے ملک کے مجموعی قرضوں اور بیرونی ادائیگیوں کے مسائل مکمل طور پر ختم نہیں ہوں گے۔






