برطانوی حکومت نے کاروباری اداروں کے اخراجات کم کرنے کے لیے نئے اقدامات کا اعلان کیا ہے، جن کے تحت کمپنیوں کو سالانہ تقریباً 80 کروڑ پاؤنڈ کی بچت ہونے کی توقع ہے۔حکومت کے مطابق چھوٹے کاروباروں کے لیے ضابطوں کی پابندی سے متعلق کاغذی کارروائی آسان بنانے سے 29 کروڑ پاؤنڈ، اثاثہ جات کی انتظامی کمپنیوں کے لیے دہرائی جانے والی رپورٹنگ کم کرنے سے 10 کروڑ 50 لاکھ پاؤنڈ، جبکہ جائیداد کی خرید و فروخت کے عمل کو آسان بنانے سے 11 کروڑ 60 لاکھ پاؤنڈ کی بچت متوقع ہے۔
اس کے علاوہ 250 سے زائد مصنوعات پر درآمدی ٹیرف کی معطلی میں مزید ایک سال کی توسیع کی جائے گی، جس سے کاروباری اداروں کو تقریباً 15 کروڑ 50 لاکھ پاؤنڈ کا فائدہ پہنچنے کی توقع ہے۔ حکومت کا کہنا ہے کہ ان اقدامات کا مقصد کاروباری اخراجات کم کرنا، سرمایہ کاری کی حوصلہ افزائی کرنا اور روزگار کے نئے مواقع پیدا کرنا ہے۔





