دینہ (ضلع جہلم): جی ٹی روڈ پر ڈی مارٹ کے باہر فائرنگ سے 20 سالہ لڑکی کرن جاں بحق ہو گئی۔ ابتدائی اطلاعات کے مطابق مقتولہ اپنے اہلِ خانہ کے ساتھ خریداری کے لیے آئی ہوئی تھی کہ مبینہ طور پر اس کے سابق منگیتر ملک خرم نے اسے فائرنگ کا نشانہ بنایا اور موقع سے فرار ہو گیا۔

پولیس ذرائع کے مطابق ملزم کی چھ سال قبل مقتولہ سے منگنی ہوئی تھی، تاہم بعد میں رشتہ ختم ہو گیا اور لڑکی کے گھر والوں نے شادی سے انکار کر دیا۔ مبینہ ملزم شادی شدہ اور دو بچوں کا باپ بتایا جاتا ہے۔ مقتولہ نئی آبادی دینہ کی رہائشی تھی، جبکہ ملزم کا تعلق دینہ کے گاؤں چک اکاء سے ہے۔

واقعے کی اطلاع ملنے پر پولیس موقع پر پہنچی، لاش کو تحویل میں لے کر پوسٹ مارٹم کے لیے ڈی ایچ کیو ہسپتال جہلم منتقل کر دیا گیا اور قانونی کارروائی شروع کر دی گئی۔ پولیس کے مطابق ملزم کی گرفتاری کے لیے کارروائی جاری ہے۔